آیتہ الکرسی کی فضیلت

حضرت ابوہریرہ رضی اللّٰہ تعالیٰ عنہ بیان فرماتے ہیں کہ رسول اللّٰہ صلی اللّٰہ علیہ وسلم نے مجھے بیت المال کی نگرانی اور زکوٰۃ رمضان کی حفاظت کا کام سونپا ۔

ایک رات بیت المال کے ایک کونے سے بوریوں میں سے غلہ نکالنے کی آواز آئی۔ میں نے دیکھا کہ ایک شخص تیزی سے غلہ سمیٹ رہا ہے                                                                                     

میں نے اسے پکڑ لیا اور اس سے کہا کہ میں تجھے رسول اللّٰہ صلی اللّٰہ علیہ وسلم کے سامنے پیش کروں گا ۔

وہ شخص التجا کرنے لگا کہ مجھے چھوڑ دو ، میں بہت ضرورت مند اور کثیر العیال ہوں۔                               

میں نے ترس کھا کر اس شخص کو چھوڑ دیا ۔

Moral Stories

صبح مسجد نبوی صلی اللّٰہ علیہ وسلم میں رسول اللّٰہ صلی اللّٰہ علیہ وسلم سے ملاقات ہوئی تو انہوں نے دریافت فرمایا : اے ابو ہریرہ ، رات تم نے جس شخص کو پکڑا تھا اس کا کیا بنا ؟

میں نے عرض کیا ، یا رسول اللّٰہ صلی اللّٰہ علیہ وسلم ، اس نے اپنی حاجت مندی بیان کی اور کہا کہ وہ کثیر العیال ہے اس لیے میں نے ترس کھا کر اسے چھوڑ دیا ۔

حضور صلی اللّٰہ علیہ وسلم نے فرمایا : اس نے تم سے جھوٹ بولا ، وہ دوبارہ آئے گا

مجھے یقین ہو گیا کہ وہ ضرور دوبارہ آئے گا کیونکہ رسول اللّٰہ صلی اللّٰہ علیہ وسلم نے فرمایا تھا ۔

میں محتاط ہو گیا اور اس کی تاک میں لگا رہا ۔

آدھی رات گزری تھی کہ وہ پھر آیا اور غلہ سمیٹنے لگا ۔

Moral Stories

میں نے اسے پکڑ لیا اور اس سے کہا ، اس مرتبہ تمہیں ضرور رسول اللّٰہ صلی اللّٰہ علیہ وسلم کی خدمت میں پیش کروں گا ۔ پھر اس نے فریاد کی کہ مجھے چھوڑ دو میں نہایت ضرورت مند اور کثیر العیال ہوں ۔

میں نے پھر اس پر رحم کیا اور اسے چھوڑ دیا ۔ جو کچھ اس نے سمیٹا تھا وہیں رکھ دیا اور چلا گیا ۔

اگلی صبح رسول اللّٰہ صلی اللّٰہ علیہ وسلم سے ملاقات ہوئی تو آپ صلی اللّٰہ علیہ وسلم نے دریافت فرمایا ! اے ابو ہریرہ ، تمہارے قیدی کا کیا بنا ؟

میں نے عرض کیا ، یا رسول اللّٰہ صلی اللّٰہ علیہ وسلم ، اس نے اپنی ضروریات کا ذکر کیا اور کہا کہ اس کے بہت بچے ہیں ۔ اس لیے میں نے اس پر رحم کیا اور اسے چھوڑ دیا ۔

حضور صلی اللّٰہ علیہ وسلم نے فرمایا ! اس نے تم سے جھوٹ بولا ہے وہ پھر آئے گا

میں چوکنا ہو گیا اور اس کے انتظار میں رہا ۔

آدھی رات گزری تھی کہ پھر بوریوں میں سے چیزیں نکالنے کی آواز آئی ۔

میں نے اس شخص کو دبوچ لیا اور اس سے کہا کہ اس دفعہ میں تمہیں ضرور رسول اللّٰہ صلی اللّٰہ علیہ وسلم کی خدمت میں پیش کروں گا ۔ یہ تیسری اور آخری مرتبہ ہے

ہر دفعہ تم کہتے ہو کہ دوبارہ نہیں آؤ گے مگر پھر آجاتے ہو ۔

اس نے کہا ، مجھے چھوڑ دو میں تمہیں کچھ ایسے کلمات سکھاتا ہوں جن سے اللّٰہ تعالیٰ تمہیں فائدہ پہنچائے گا ۔

جب تم رات کو سونے کے لیے اپنے بستر پر لیٹ جاؤ تو آیتہ الکرسی آخر تک پڑھ لیا کرو ۔

اگر تم ایسا کرو گے تو اللہ تعالیٰ کی طرف سے تمہاری حفاظت ہوتی رہے گی اور صبح تک کوئی شیطان تمہارے قریب نہیں آئے گا ۔

Moral Stories

جب اس نے یہ بات بتائی تو میں نے اسے چھوڑ دیا ۔

اگلی صبح رسول اللّٰہ صلی اللّٰہ علیہ وسلم نے دریافت فرمایا ، اے ابو ہریرہ ، تمہارے قیدی کا کیا ہوا ؟

میں نے عرض کیا : یا رسول اللّٰہ صلی اللّٰہ علیہ وسلم اس نے مجھے کچھ کلمات سکھائے ہیں اور اس کا دعویٰ تھا کہ ان کلمات کی بدولت اللّٰہ تعالیٰ مجھے نفع پہنچائے گا ۔

رسول اللّٰہ صلی اللّٰہ علیہ وسلم نے فرمایا : بات تو اس نے سچ کہی مگر ہے وہ نہایت جھوٹا ۔

اے ابو ہریرہ ، جانتے ہو کہ تین راتوں سے تم کس کے ساتھ مخاطب تھے ؟

میں نے عرض کیا ، میں نہیں جانتا ۔

حضور صلی اللّٰہ علیہ وسلم نے فرمایا : وہ ایک شیطان تھا ۔

Moral Stories 

Moral Stories for children